महान्यूज मंत्रालय
महान्यूज मंत्रालय
चांदा ते बांदा योजनेअंतर्गत शेतक-यांच्या आर्थिक उन्नतीसाठी विविध करार-गृहराज्यमंत्री दीपक केसरकर बुधवार, १८ सप्टेंबर, २०१९


मुंबई :
राज्यात चांदा ते बांदा योजनेअंतर्गत कोकण विभागातील सिंधुदूर्ग व विदर्भातील चंद्रपूर या जिल्ह्यांमध्ये विविध पथदर्शी कार्यक्रम राबविण्यात येत आहेत. शेतक-यांच्या आर्थिक उन्नतीसाठी खादी व ग्रामोद्योग मंडळ, पर्यटन विकास महामंडळ आणि महाराष्ट्र लघुउद्योग विकास महामंडळासोबत नेटफार्म इनोवेशन कंपनी आणि स्वस्थबायो वेलनेस या कंपनीसोबत आज गृह (ग्रामीण) राज्यमंत्री दीपक केसरकर यांच्या उपस्थितीत करार करण्यात आले.

आज मंत्रालयात पत्रकार परिषदेचे आयोजन करण्यात आले होते. या परिषदेस नियोजन विभागाचे अपर मुख्य सचिव देवाशिष चक्रवर्ती, महाराष्ट्र लघुउद्योग विकास महामंडळाचे व्यवस्थापकीय संचालक संतोष कुमार, खादी व ग्रामोद्योगचे मुख्य कार्यकारी अधिकारी निलीमा करेकट्टा, पर्यटन विकास महामंडळाचे व्यवस्थापकीय संचालक अभिमन्यू काळे, गुंतवणुकदार नेटॅफार्म इनोव्हेशन प्रा.लि.चे आणि स्वस्थबायो वेलनेस कंपनीच्या संचालक ऋता कामत, प्रशांत कामत आदीसह संबंधित अधिकारी उपस्थित होते.

मंत्री श्री. केसरकर म्हणाले, चांदा ते बांदा या योजनेअंतर्गत नैसर्गिक साधनसंपत्तीचा वापर करून शेतक-यांचा आर्थिक विकास करण्याच्या दृष्टीने विविध करार आज करण्यात आले आहेत. खादी व ग्रामोद्योग मंडळातर्फे सिंधुदूर्ग जिल्ह्यात मधमाशापालन उद्योग शेतकऱ्यांना शेतीतील पीक उत्पादनाबरोबरच मध काढणे, नारळाच्या झाडापासून नीरा काढून त्यापासून नीरा साखर, मध, गुळ, व्हीनेगर, स्वास्थ उत्पादके, लहान मुलांचे उत्पादके तयार करण्यात येणार आहेत. यामुळे नारळ उत्पादकांचे आर्थिक उत्पादन वाढण्यास सहाय होणार आहे. याचबरोबर रोजगारही उपलब्ध होणार आहेत. नारळ उत्पादक शेतक-यांना मंडळाच्यावतीने प्रशिक्षण देण्यात येणार आहे. याचबरोबर ७५ टक्के अनुदानही देण्यात येणार आहे. ५० हजार लोकांना याचा फायदा होणार असल्याचेही मंत्री केसरकर यांनी यावेळी सांगितले.

याचबरोबर काथ्या उद्योगाच्या विकासासाठी योजना राबविण्यात येणार असून, नारळाच्या सोडणावर प्रक्रिया करून त्यापासून काथ्या तयार करण्यासाठी महाराष्ट्र लघुउद्योग विकास महामंडळामार्फत १२ सामुहिक सुविधा केंद्राची उभारणी करण्यात येणार आहे. याअंतर्गत काथ्या महिलांना उपलब्ध करून देण्यात येणार आहे त्यापासून दोरी तयार करण्यात येणार आहे. यामुळे १२०० महिलांना रोजगार प्राप्त होणार आहे.

याचबरोबर पर्यटक विकास महामंडळाअंतर्गत तारकर्ली व आरोंदा खाडीमध्ये हॉप ऑन हॉप ऑफ सुविधा व साहसी जलक्रीडा, नापणे व भोगवे येथे लाकडी कॉटेज, आरोंदा येथे फ्लोटींग कॉटेज, उपहार गृह व हाऊस बोट, भोगवे समुद्र किना-यावर जलक्रिडा, तिल्लारी येथे साहसी जलक्रीडा व सफारी बोट अशा सुविधा विकसित होणार आहेत. यात २५.४७ कोटी रकमेच्या सुविधा विकसित होणार असल्याची माहितीही मंत्री श्री. केसरकर यांनी यावेळी दिली.
'महान्यूज' मधील मजकूर आपण 'महान्यूज'च्या उल्लेखासह पुनर्मुद्रित केल्यास आम्हाला आनंदच वाटेल.
Share बातमी छापा