महान्यूज बातम्यातील महाराष्ट्र
महान्यूज बातम्यातील महाराष्ट्र
पालघर येथे महाराष्ट्र दिन सोहळा उत्साहात साजरा बुधवार, ०१ मे, २०१९


पालकमंत्री विष्णू सवरा यांच्या हस्ते ध्वजारोहण

पालघर :
महाराष्ट्र राज्य स्थापनेच्या ५९ वा वर्धापन दिन सोहळा येथील कोळगाव पोलीस परेड ग्राऊंडवर उत्साहात साजरा झाला. पालकमंत्री विष्णू सवरा यांच्या हस्ते ध्वजारोहण करण्यात आले. यावेळी पालकमंत्र्यांनी सर्वांना महाराष्ट्र दिन आणि कामगार दिनानिमित्त शुभेच्छा दिल्या.

या समारंभासाठी स्वातंत्र्य सैनिक, जिल्हा परिषद अध्यक्ष विजय खरपडे, नगराध्यक्ष डॉ. उज्ज्वला काळे, जिल्हाधिकारी डॉ. प्रशांत नारनवरे, जिल्हा परिषदेचे मुख्य कार्यकारी अधिकारी मिलिंद बोरीकर, सहाय्यक जिल्हाधिकारी वसुमना पंत, जिल्हा पोलीस अधीक्षक गौरव सिंग यांच्यासह विविध शासकीय कार्यालयांचे वरिष्ठ अधिकारी, पत्रकार, रहिवासी उपस्थित होते.

श्री. सवरा यांनी शुभेच्छा देताना महाराष्ट्र राज्य निर्मितीसाठी बलिदान दिलेल्या तसेच स्वातंत्र्य लढ्यात प्राणांची आहुती दिलेल्या पालघर जिल्ह्यातील हुतात्म्यांचे स्मरण करून त्यांना वंदन केले. श्री. सवरा म्हणाले, महाराष्ट्र ही संत, विचारवंत आणि शूरवीर यांची भूमी असून देशाच्या विकासात महाराष्ट्राचे मोलाचे योगदान आहे. देशाच्या, पर्यायाने जगाच्या विकासात कामगारांच्या योगदानाला सलाम करण्यासाठी १ मे हा दिवस जगभरात कामगार दिन म्हणून पाळला जातो.

यावेळी झालेल्या संचलनात पालघर पोलीस दल, महिला पोलीस दल, नगरपालिकेचे अग्निशमन दल, फॉरेन्सिक सायन्स पथक, पालघर पहिली महिला दामिनी पथक, आरोग्य विभागाची 108 रुग्णवाहिका, बॉम्बशोधक पथक, दंगल नियंत्रण पथक, शीघ्र प्रतिसाद दल आदींनी सहभाग घेतला.

15 वर्ष उत्कृष्ट सेवाभिलेख ठेवून बजावलेल्या कामगिरीबद्दल माणिकपूर पोलीस स्टेशन चे सहायक पोलीस उपनिरीक्षक प्रदीप नामदेव विंदे यांना पोलीस महासंचालकांचे सन्मानचिन्ह प्रदान करून जिल्हाधिकारी डॉ. प्रशांत नारनवरे यांच्या हस्ते यावेळी गौरविण्यात आले. यावेळी भगिनी समाज विद्या मंदिरच्या विद्यार्थ्यांनी विविध सांस्कृतिक कार्यक्रम सादर केले. कार्यक्रमाचे सूत्रसंचलन शैलेश राऊत यांनी केले.
'महान्यूज' मधील मजकूर आपण 'महान्यूज'च्या उल्लेखासह पुनर्मुद्रित केल्यास आम्हाला आनंदच वाटेल.
Share Print This Result