महान्यूज बातम्यातील महाराष्ट्र
महान्यूज बातम्यातील महाराष्ट्र
वृक्षलागवड मोहिमेत बचत गटांचेही सहकार्य घ्यावे- चंद्रशेखर बावनकुळे मंगळवार, ११ जून, २०१९



नागपूर : वृक्षलागवड मोहिमेत शासकीय यंत्रणा, सामान्य नागरिक, अशासकीय संस्था यासह बचत गटांना सहभागी करून त्यांचे  सहकार्य  घ्यावे, असे निर्देश पालकमंत्री चंद्रशेखर बावनकुळे यांनी दिले.
 

बचतभवन येथे पालकमंत्र्यांनी सन 2019 मधील 33 कोटी  वृक्षारोपण कार्यक्रमाचा आढावा घेतला. यावेळी ते बोलत होते. बैठकीला आमदार सर्वश्री अनिल सोले, सुधाकर कोहळे, सुधाकर देशमुख, महापौर नंदा जिचकार यासह अपर जिल्हाधिकारी श्रीकांत फडके उपस्थित होते. 

जिल्ह्याचे यावर्षीचे उद्दिष्ट 98.39 लक्ष आहे. त्यामध्ये प्रादेशिक वनविभाग 26.62 लक्ष, सामाजिक वनीकरण 15 लक्ष, महाराष्ट्र वनविकास महामंडळ 5.81, ग्रामपंचायत 25.06 व  इतर विभाग मिळून 25.90 लक्ष इतके उद्दिष्ट आहे. 

श्री.बावनकुळे यांनी यावेळी विभागनिहाय आढावा घेतला. त्यामध्ये उपविभागीय अधिकारी व सार्वजनिक बांधकाम विभागाचे अधिकारी यांनी समन्वयाने काम करून तालुकानिहाय खड्डे खोदण्याच्या कामाला गती द्यावी. निर्धारित लक्ष्यांक साध्य करण्यासाठी साधारणत: तिप्पट नियोजन करावे अशा सूचना दिल्या. सामाजिक वनीकरण विभागाने सर्व यंत्रणांना मागणीप्रमाणे रोप उपलब्ध करून द्यावीत. नुकतीच वनमंत्री महोदयांनी विभागाची बैठक घेतली. पुढील आठवड्यात सर्व लोकप्रतिनिधींची विभागीय आयुक्तांसोबत या मोहिमेची प्रगती जाणून घेण्यासाठी बैठक होईल. 1 जुलैपासून मोहीम सुरू होईल. मोहिमेत वृक्ष लागवडीसोबतच संगोपन देखील गरजेचे आहे. त्यासाठी ट्री गार्डची देखील व्यवस्था करण्याचे निर्देश त्यांनी सार्वजनिक बांधकाम विभागाला दिले.

    
'महान्यूज' मधील मजकूर आपण 'महान्यूज'च्या उल्लेखासह पुनर्मुद्रित केल्यास आम्हाला आनंदच वाटेल.
Share बातमी छापा