महान्यूज बातम्यातील महाराष्ट्र
महान्यूज बातम्यातील महाराष्ट्र
जलयुक्त शिवार अंतर्गत कामे पावसाळ्यापूर्वी पूर्ण करावीत - अरुण डोंगरे शुक्रवार, १९ मे, २०१७
नांदेड : राज्य शासनाच्या जलयुक्त शिवार अभियान, मागेल त्याला शेततळे आणि गाळमुक्त धरण-गाळयुक्त शिवार या महत्वाकांक्षी योजना आहेत. या योजनेची कामे संबंधीत यंत्रणांनी येत्या पावसाळ्यापूर्वी नियोजनपूर्वक पूर्ण करावीत, असे निर्देश जिल्हाधिकारी अरुण डोंगरे यांनी दिले.

नांदेड जिल्हाधिकारी कार्यालय आवारातील डॉ.शंकरराव चव्हाण नियोजन सभागृहात जलयुक्त शिवार अभियान व मग्रारोहयो कामांची आढावा बैठक श्री.डोंगरे यांच्या अध्यक्षतेखाली काल झाली, त्यावेळी श्री.डोंगरे बोलत होते. यावेळी अप्पर जिल्हाधिकारी संतोष पाटील, जिल्हा अधीक्षक कृषि अधिकारी डॉ.तुकाराम मोटे, उपजिल्हाधिकारी (रोहयो) बी. एम. कांबळे, लघू सिंचन विभागाचे कार्यकारी अभियंता व्ही.पी.शाहू तसेच वने, सामाजिक वनीकरण, कृषि आदी विभागाच्या अधिकाऱ्यांसह जिल्ह्यातील उपविभागीय अधिकारी उपस्थित होते.

जिल्ह्यातील जलयुक्त शिवार अभियानांतर्गत कामांच्या प्रगतीचा आढावा घेऊन श्री.डोंगरे म्हणाले की, जलयुक्त शिवार, मागेल त्याला शेततळे व गाळमुक्त धरण-गाळयुक्त शिवार या राज्य शासनाच्या महत्वाकांक्षी योजना आहेत. या योजनांच्या कामांना अधिक गती देऊन येत्या 15 जून पर्यंत कामे पूर्ण करण्यासाठी प्राधान्य द्यावे. शेतकऱ्यांच्या हिताची गाळमुक्त धरण-गाळयुक्त शिवार योजनेत स्थानिकांच्या सहभागासाठी त्यांना प्रोत्साहित करावेत. संबंधीत यंत्रणांनी कामांचा नियमित आढावा घेऊन या कामांना अधिकाधिक गती देऊन ही कामे पूर्ण करावीत, असे निर्देशही त्यांनी दिले.

जिल्ह्यात जलयुक्त शिवार अभियानांतर्गत सन 2015-16 व सन 2016-17 मधील यंत्रणानिहाय कामांच्या आढावा बरोबर, महात्मा गांधी ग्रामीण रोजगार हमी योजनेच्या कामांचाही आढावा घेण्यात आला. अप्पर जिल्हाधिकारी संतोष पाटील यांनी गाळमुक्त धरण-गाळयुक्त शिवार ही शेतीची सुपिकता वाढविण्यासाठी अभिनव योजना आहे. जिल्ह्यात लोकसहभाग व शेतकऱ्यांच्या सहकार्यातून ही योजना प्रभावीपणे राबवावी, असे सांगितले.

यावेळी जिल्हा अधीक्षक कृषि अधिकारी डॉ. तुकाराम मोटे यांनी जलयुक्त शिवार अभियान व उपजिल्हाधिकारी (रोहयो) बी. एम. कांबळे यांनी मग्रारोहयो अंतर्गत जिल्ह्यातील विविध कामांची माहिती दिली.
'महान्यूज' मधील मजकूर आपण 'महान्यूज'च्या उल्लेखासह पुनर्मुद्रित केल्यास आम्हाला आनंदच वाटेल.
Share बातमी छापा